Xabier Mendigureni elkarrizketa

"Bizitzen segitzearen aldeko kantak dira ipuinok"

Ostirala, 2014-11-14
Xabier Mendigureni elkarrizketa

Arantzak barrurantz (Elkar) liburua plazaratu du Xabier Mendiguren Elizegi idazleak eta editoreak. Azken urteetan idatzitako bost kontakizun batu ditu. Noraezean dabiltzan pertsonaiak marraztu ditu, arantza zaharren bat atera behar dutenak edo bere baitako gabeziak nola izendatu ez dakitenak.

Ainara Lasa Perezekin solasean

"FALTA (ez) diren gauzak" liburua aurkeztuko du gaur

Ostirala, 2014-11-07
Ainara Lasa Perezekin solasean

Ainara Lasa Perezek FALTA (ez) diren gauzak izeneko artista liburua aurkeztuko du gaur Donostiako Garoa liburu-dendan, Argitaletxea EDO!ren Begikoak sailean. Liburua aurkeztearekin batera, izen bereko erakusketa inauguratuko dute Garoan bertan. Aurkezpena 19:00etan izango da, eta abenduaren 9a bitarte ikusi ahal izango da. Elkarrizketa honetan aletu ditugu hitzez eta batez ere irudiz osatutako liburu-objektu honen nondik norakoak. (Argazkia: Urola Kostako Hitza).

Javier Aramendirekin solasean

Verba polita, bere lehen poesia liburua plazaratu du Ereinekin

Ostirala, 2014-10-31
Javier Aramendirekin solasean

"Ez da arima urratu bat bertsoetan adierazten dena. Ez nabil zergatien edo katarsiaren bila. Uneko sentsazioak, sentimenduak, gogoetak eta abar azaldu nahi ditut. Unean uneko aldartea ere bai. Ez gaude beti triste. Gainera, ironiak edo umoreak zama ilun hori arintzeko balio du". Hala azaldu digu Verba polita (Erein, 2014) poesia liburuaren egileak. Formari, hitzen itxurari erreparatzen dio Javier Aramendik. Hitzak protagonista dira hainbat poemetan, bizirik daude, eta irakurleari ari dira hizketan.  "Uste dut ona dela hitzekin, hizkuntzarekin jolastea, mezu formaletatik ihes egin tarte batez, eta hizkuntza gozatu, hizkuntzaz gozatu".

Iban Zalduari elkarrizketa

"Fikzioa behar dut pertsona bezala funtzionatzeko gizarte honetan"

Ostirala, 2014-10-17
Iban Zalduari elkarrizketa

"Liburu honetaz esan daitekeen gauza onenetakoa da Zalduaren ipuin liburu bat dela, horrek esan nahi duen guztiarekin.  Bere ipuingintza-ibilbidearen gailurretako bat". Ibon Egañak halaxe adierazi zuen Inon ez, inoiz ez (Elkar, 2014) liburuaren aurkezpen ekitaldian. Fikzioaren indarrean sinesten duen egilea dela Iban Zaldua, hori ere esan zuen Egañak. Fikzioa da, hain zuzen, liburu honen bitartez aldarrikatzera datorrena: "Nik fikzioa behar dut pertsona bezala funtzionatzeko gizarte honetan", Iban Zalduak  halaxe aitortu digu Hitzen Uberan izan dugun solasaldian. Lehen edizioa agortuta, Elkarrek bigarren edizio bat jarri berri du martxan.

Jaime Valverde Rodriguezekin solasean

"Ander Lipusen antzerkigintza: errituala, kultura eta ikuskizuna" izeneko saiakera plazaratu du

Ostirala, 2014-10-10
Jaime Valverde Rodriguezekin solasean

Jaime Valverde Rodriguezek Ander Lipusen antzerkigintza: errituala, kultura eta ikuskizuna izeneko saiakera plazaratu du, 2013ko Becerro de Bengoa saiakera saria jaso ostean. Lan hau master bukaerako lan batean oinarritzen da, eta egun tesi doktorala dabil prestatzen: Herrikoitasuna garaiko euskal teatroan: Maite Agirre, Antton Luku eta Ander Lipus. Aukera gutxi dugu euskaraz egungo sortzaileen lanen inguruko gogoeta egiteko, horregatik, liburuaz gain euskal teatroak duen dokumentazio beharraz eta GARA egunkarian egiten duen antzerki kritikaz ere mintzatu gara egilearekin.

Josu Martinezekin solasean

“Ihesaldiak betidanik iruditu zaizkit ederrak”

Ostirala, 2014-10-03
Josu Martinezekin solasean

“Mundu mailan hainbat ihesaldik izan duten ospea ikusita, beti deitu dit atentzioa Euskal Herrian gertatu direnei buruz ze literatura gutxi dagoen. Horregatik, euskal gatazkari lotuta, azken 50 urteetan gertatu diren hamar ihesaldiren kronika proposatu gura dizuet hurrengo orrialdeetan”. Horrela mintzo da Josu Martinez,  Tunelak, izarak, mozorroak eta bafleak (Elkar, 2014) liburuaren hitzaurrean. “Batzuk aski ezagunak izango dira eta ezezagunak beste hainbat. Denak, hala ere, ausardiaz eta irudimenez beteak. Modu batean edo bestean, artelanak denak”.

Markel Ormazabalekin solasean

Ostirala, 2014-09-26
Markel Ormazabalekin solasean

Jon Markel Ormazabal Gaztañagak Hemen naiz, ez gelditzeko baina liburua kaleratu berri du Txalaparta argitaletxearen eskutik. Kartzelan idatzitako liburua da hauxe, kartzela ulertzeko beharrak idaztera bultzaturik.

Itxaro Bordarekin solasean

"Ez naiz sekula eskuak lotuak ukan dituen idazlea izan"

Ostirala, 2014-09-19
Itxaro Bordarekin solasean

"Ez naiz sekula eskuak lotuak ukan dituen idazlea izan, baina iruditzen zait zenbaitetan ahoa biloz trabatua eduki dudala. Neronen eta neronekiko aurre-iritziez ari naiz bereziki, hauen gainditzeaz, ezezkoan garatzen doan mundu eta ingurune sozialean, baikorra eta piska bat naif izateko bidea jorratzeko moduan". Sosegu moduko bat igarri dugu Zure hatzaren ez galtzeko (Elkar) poesia liburuan. Ados dago idazlea, baina ez da gauza erraza izan. "Saiatu naiz perpausak negatiboan ez hasten. Ariketa harrigarria suertatu da niretzat, ezen ohiturak joera horretara eramaten nauelako sistematikoki. Lasaiago idatzi ditut poesiak, beraien barneko gatazka ala tragedia baztertu gabe. Gauzen, gertakarien edo gogoeten muinera jaisteko, onartu ezinak diren ebazpenak onartzeko, lasaitasun zerbait premiazkoa da".

Lander Garrori elkarrizketa

"Erretxinik gabeko nobela bat idatzi nahi nuen"

Ostirala, 2014-09-05
Lander Garrori elkarrizketa

Gorka Arrese editorearen esanetan, “euskal literaturak inoiz kontatu ez duen istorio bat kontatzen du”. Errefuxiatuen gaia du muinean Gerra Txikia (Susa) nobelak eta autobiografikotik asko duela aitortu zuen Lander Garrok berak, liburuaren aurkezpenean. Gaia eta 80etako giro hura gogorra izanik ere, umore kolpeak ere badira nobela honetan. "Joera hori lotuko nuke literatura anglosaxoiarekin, eta bereziki azken ehun urteotako literatura amerikarrarekin. John Kennedy Toole, Steve Tesich, Ken Kesey, Truman Capote... Idazle hauen koordenadetan, umoreak presentzia handia dauka. Eta literatura horren oihartzuna nire liburuan islaturik ikustea gustuko dut. Idazle horiengatik ikasi dudalako ia dakidan guztia".

Idazleekin solasean

Irailetik osatu dugun elkarrizketen zerrenda  

Osteguna, 2014-07-24
Idazleekin solasean

Hitzen Uberanek oporrak hartuko ditu abuztuan, eta errepaso egin nahi izan diogu irailetik egin ditugun elkarrizketei. Liburu berriei loturiko elkarrizketak izan dira gehienak, oholtza gaineko literaturari loturiko besteetan. Bertan topatuko dituzue guztiak zerrendaturik. On egin eta uda on!

Amuak

Bideoa

    Samuel Beckett idazle irlandarraren Molloy eleberria aurkeztu dute gaur. Gerardo Markuletak ekarri du euskarara, Meettok argitaletxearen eskutik. Aurkezpenean, itzultzaileak hainbat zertzelada eman ditu eleberriaren nondik norakoez: Molloy hau trilogia baten lehen partea da, ondotik datozkio Malone Meurt eta L’Innomable. Hiruetan ere, pertsonaia nagusi baten jarioa da liburuaren ardatza; existentziaren absurdoa eta zentzurik eza, aldiz, muina. Frantsesez idatzi zituen lanok Beckettek, ingelesez zeukan estiloa kendu nahi zuelako gainetik. Markuletak esan duenez, berrogeita hamar literatur lanetik gora itzuli ostean, hauxe gertatu zaio nekezen: luzeragatik, narratzailearekin enpatizatzeko ezintasunagatik… Hala ere, azpimarratu du merezi duela horrelako lan klasikoak gure hizkuntzara ekartzea, zailak izanagatik. Ekarpena egiten diote hizkuntzari, eta irakurle-belaunaldi berri bat elikatzen dute. Halaber, Ramon Etxebeste Meettokeko editorearen esanetan, garrantzitsua zen Beckett euskaratzea, XX. mendeko kanona markatu duen heinean. Becketten zenbait lan laburrago baditugu jada euskaraz, hala nola, Godoten zain eta Lehen Amodioa.

Agenda

Harremanetarako

Oier Guillan & Danele Sarriugarte & Imanol Ubeda
This e-mail address is being protected from spambots. You need JavaScript enabled to view it.

Txioak

Laguntzaileak